ここから本文です
  • 2013年9月18日しまくとぅば県民大会へ行ってきました。しまくとぅばのために何かしようと掲示板を立てました。63歳中部に住む老女です。沖縄語で話します。よろしくお願いします。

    ぐすうよう ちゅううがなびら。県民大会行じ ちゃあがなさねんりち うーばぐとぅ そういびいん。しまくとぅば ちからねーやー んりうむとういみせる ぐすーよう くまんじゆんたくさびらな。ゆたしくうにげえさびら。
    ちゅうぬ しんぶんなかい 知事ぬくうらんしやうかさん 大会決議ぬねーんしやうかさんり 新報やかちょういびたん。 うっさびけえそうるうっぴやならんさとぅ うむいびたん。

    みなさん こんにちわ。 県民大会行って どうにかしなければと 余計なこと やっています。しまくとぅば 使わなければ とおもっていらっしゃる みなさん ここでお話しましょう。 よろしくお願いします。
    今日の 新聞に 知事が来ないのはおかしい 大会決議のないのはおかしいと 新報は書いてありました。嬉しがっているだけではダメだと 思いました。

  • <<
  • 52 33
  • >>
  • 52(最新)

    nag***** 2月20日 19:14

    辺野古行じちゃん。今日ん機動隊員がうたん。工事車両入りーんち、座り込み排除すたん。一人かちみらったん。
    ぬうかんげーとうーがや。あんすかなーさねーならんがやー。「基地や作らさん」でぃいちゃくとぅ 
    「静かにしなさい」んでぃ いたん。ぬーが うりいいんちる 辺野古ちょうる。ふらーやあらに。

  • 沖縄県やぬーそうが。しまくぅとばぼんぼん んでぃいち テレビ番組そうしが、うれーゆたさん。
    いいぺーじょうとうやさ。うちなーぐちびけーあらん。みやーくふつん えーまぐちん よなぐにくぅとばん
    そーたん。いっぺーじょうとうやさ。あんしが辺野古ちゃーすが。辺野古反対ん CMならんがやー。
    辺野古残さねーならん んでぃいち CMさんがやー。自民党が圧力かきーるはじやー。ならんさに。

  • 沖縄県やゆーそうが。まぎブロック落とぅさんきよー んでぃいゆーさんどぅあみ。わんいゆみ。
    んでぃ言ち裁判所にいいんならん。じゃーひぇーやさんでぃいち うわらりーみ。とぅみらな。
    とぅみらな。辺野古とぅみらな。トンブロックちゅうやいくち うとうちゃん、んでぃいち
    めーなち あびとーかねーならん。めーなち海やしなさっとううん。わかてぃうらねーならん。
    あわりやさ。いくさ世にいちゅる みちなかにうりば 先やいくさ世とぅ わかるくりさ
    あきさみよ。ぬうんちあんなたが。

  • うってぃーやまぎブロック 9個落とぅちゃんり。始め-2・3個んでぃいやーま ゆだんしみとうてぃ
    9個10個なれーからー 20日せー終わゆん。あきさみよー。うぬまぎブロックや うめたてちんかいん
    落とぅすんりちあらん 汚濁防止ぬ かーまくさーんかい 落とぅすんりろー。あんすか海やんじゅみ。
    かーまくさーんかい ぬうんりち まぎブロック落とぅさねーならんが。

  • 昨日やまぎブロック 7個海んかい落とぅちゃんり。ぬうんち止みららんが。テレビし
    うり見ちょうし ちゃっさくちさくとぅ。くちさんどー んでぃ言ちん たーんちかん。
    くちさせー んないぬむん。わんちゅいやあらん。やしが、くちさん。うり見ちょうしや
    いっぺー くちさん。とぅんとぅるもーやするかくちさん。くちさんどー。やみてぃきれー。

  • 昨日や辺野古行じちゃん。水曜日やたくとぅ工事車両や入らんたん。第二ゲート前んかい座ちょうたん。
    くぬゲートや弾薬運搬んかい使いくとぅ くまうさーれーから アメリカーたーやいっぺーわじゆんり
    前に委員長がいちょうたん。くまから工事作業員が入し 止みゆんり副委員長が言ちょうたん。

    作業員や今日や入ゆーさんたるぐとぅやん。水曜日やいっぺー ゆるっとぅしうーあびーんさんてぃん
    すむくとぅ いっぺー行ちやっさん。月火金んくーよーんでぃ 世話人ぬ言ちょうたしが
    ないるうっぴるないる。んでぃ思ゆしや ふゆーるやがやー。うむさくとぅるする。
    人からしいよーんでぃ言らってぃするむのーあらん んでぃ思てぃふゆーさな。

    あんしが、めーに新聞し読だしが、機動隊んかい はじかさーねらに んでぃいしや いっぺーなちかさん
    んでぃ書ちょうたしが、うりがゆーわからん。いぬうちなーんちゅ すぐいくるち いっぺーにくさる
    ふうじする機動隊んかい はじかさーねーらに んでぃ言しが ぬうんちなちかさが。

    暴力んかい暴力したちゅしが いいかんげーやあらん んでぃ言せーわかいん。いぬうちなーんちゅ
    おーてぃちゃーすが んでぃいしんわかいん。わかいしが ぬうんち はじかさーねえらに んでぃ
    言いしが 悪っさがわからん。仕事やくとぅちゃーんならんさに んでぃ言ちん、うりが兵隊なてぃ
    うったーぬ前んかい立ってぃからん はじかさーねらに んでぃいゆーさみ んでぃ言ちから
    徴兵制の兵隊やれー 言ゆーさんはじ。言ちからー憲兵んかいかちみらってぃ 金網あらに。

    平和なてぃ 金網んかい入りららんち わかとうくとぅ あんり言さんでぃ言らりれー、うれー
    じままるやるんでぃ 思ゆん。はじかさーねーらに んでぃ言いせー うかっとぅ使てぇならん。
    仕事るやる。仕事ゆいあんし 荒業んそーる んでぃいち 機動隊かたむち ちゃーすが。
    とぅすいいなぐんよーしよーしんでぃ言ち うさ-てぃちゃる事や忘ららん。

  • 海上工事から1週間。ふみおばーが立っちゃん。機動隊ぬ前んかい立っちゃん。いったーんくうねー
    ちゃあすがんでぃ言ちょーん。行かねーならんさみ。止みねーならんさに。

    あんしが機動隊やいっぺーやなむんやたん。よーしよーしんでぃやーま、座ちょーる とぅすいいなぐぬちゃー
    うさーてぃあっちょうたん。うりんかい うすらってぃからー ぬちぇえねーらんしが。

    ちゅぬしぬんどーんでぃいちん とぅみーんさんたん。にんじんやあらん。だいこぬんあらん。ぬうがやら。
    いくさはじまいや くんぐとぅやあらに。くまからが はじまいやあらに。あん思てぃいちちょおん。くちさぬならん。

  • 昨日2017年2月6日や辺野古海上工事ぬ始またる日やたん。今行かねーちゃーすがんでぃ思てぃ 辺野古かい
    行ちゃん。工事車両中んかい入し、3時間のー止みたん。基地作らんけーんでぃ 言ちちゃん。どぅぬぶんや
    しちゃん。うっさぐぁーしんり 笑いるちゅや笑り。ないるうっぴるないる。

  • 明日から 辺野古や 海上工事はじみゆんり。じゃーひぇーなとーん。ちゃあしとぅみゆしやましやが むっとぅわからん。カヌーんぬいしゆうさんむる たーがな舟んじゃなんがやー。二十人乗りぐれーぬ船ぬてぃ こうたいごうたいし 工事やみれーんりち あびーがいからんがやー。めーに海上行動んでぃ あたしがなあうれーならんるあがやー。権力やうとぅるさむんぬ うわーばぐぅとぅしからー 生ちちぇーいからんしが、うったーいしが 絶対まちがとおんりうむとうてぃん ぬうんならんせー あんしくちさぬ。ふとぅふとぅし にんじんならん。
    明日はちゃーないがやー。しわしならん。

  • 漫才 辺野古唯一

    たーりー さんらーよさんらー 辺野古唯一んでぃせー ぬーやが
    さんらー ゆうちちみそうちゃさ。わんがわかいやびーん。辺野古唯一んでぃいせー 辺野古や名護ぬ辺野古やい      びーん
    たーりー うれーわかいさ
    さんらー ゆいんでぃいせー ゆいまーるーぬ ゆいどぅやいびーん
    たーりー えーあんるやみ わからんむぬやっさー
    さんらー あんしいつんでぃいせー うちなーぐちし いちやがぬいちどぅやいびーん
    たーりー えーあんしなー んでぃぬうんでぃるいみやが
    さんらー 辺野古ぬゆいやいちやが んでぃる意味やいびーん
    たーりー えーあんしなー あんしぬうし 総理大臣や ひっちー辺野古唯一辺野古唯一んでぃいいみせえが
    さんらー オスプレイんでぃるヘリコプターぬあいびいんよ。うりが訓練すし横田基地ぬやー、岩国基地ぬやー
         んでぃいち うりが辺野古ゆいやいびーんよ。あんし辺野古ゆいやびーくとぅ 次やまーやが、次やいち     やがんでぃいち 辺野古唯一んでぃ いちょういみせるふーじやいびーん
    たーりー 辺野古ゆいやれ- 辺野古が一番やあらに
    さんらー たーりーさい。ぬういみそうが。うちなーや 71年間普天間んじ うぬヘリコプター うちょうてぃ
         うりがうてぃたい ぬうさいし いっぺーみーわくそういびいんどう。うり辺野古んかい うとぅち
         またわったーびけー みーわくすんなー。ゆいどぅやるむん んなしみーわくさねー ないびらんさに
    たーりー やんどう。わったーびけーみわくしいねー ならんしが。
    さんらー やいびいんどう。みーわくや んなしさんれーならんどう。
    たーりー あんしがさんらー うれーちちゃるくとぅねーんしが あたてぃやうゆみ
    さんらー たーりーさい。うれーわんぬかんげーるやいびーん。マイオピニオンどぅやいびーる。

  • 中学生ぬ暴行そうし 「トクダネ」んじ 流ちょうたん。親が見じからあ ふりいるすがんでぃ うもるうぐとぅ
    うちくるさっとうたん。 まわしげりやんりとびげりやんり、うりがいじめあらんり いゆるちゅや ふりてぃるうしが。ぬうんけがそうねえんりいるちゅや ぬう思とうがやあ。どぅぬくゎがさっていん あんり言らりみ。
    あんすらあ さってぃんれえ。

    見ちょうてぃ くちさするむん なんけえんながすしや ぬうぬわきぬあがやあ。うぬとぅちねえ 教育委員会ん いじめやねえらんたんり いちょうたくとぅ うりながちあとぅや 新聞かいいじめやあたんり いちょううる
    ふうじいやん。あんしいねえ テレビんじ 何回んながちゃる ねうちあてえさ。

    はじめや親ん 被害届んじゃさんり言ちょうたる ふうじいやしが、1月31日に 被害届んじゃちゃんり。
    んじゃすしがあたいめーるやる。どぅぬさる事ぬ責任や とぅらねえならんさに。ちゅくるちからあ どぅんくるさりいんち 分からねえならんさに。警察んかいんじゃちゃくとぅ うりし終わりんでぃるぐとぅやしが うりし再発防止ないがやあ。いじめねえんないがやあ。いじめねえんなすたみに ぬうすれーましが、わんやわからん。

    ちぬうぬテレビや記憶喪失ぬちゅんじとうたん。姉んでぃるちゅに 昔ぬわんとぅちがとうてぃん ひれーさびーみ
    んでぃ言ちょうたしが、いっぺーあわりやたん。

  • あぶーとぅあべー
    安心ぬ安とぅ部分ぬ部んでぃ書ち うちなーんじや あぶんでぃ読むん。
    ぶーとぅべーしや いっぺー変わゆん。
    ぶーや けーぶーんでぃるぐとぅ ふーぬあゆんでいち 幸運ぬくとぅやん。
    やくとぅあぶーんでぃいしや いっぺーふうぬあん かふうんでぃ思ゆん。

    あんしべーんでぃ言しや いっぺーやな言葉やん。掃除しょうやー んでぃ言らってぃ
    べーならんさ  んでぃ言ちから いやーやふーじらひっちらや どぅぬ口ぬ言たが んでぃ言らってぃ
    うすまさぬらーりん。やくとぅべーんでいしぇー あんすか 使てーならん言葉やん。

    かーまめー くんぐとうる 話ぬあたん。
    べートーベン 空飛んでみー
    べー 飛べん

    くんぐとうし べーんでぃいしや いっぺーやな言葉やん。
    やくとぅ あべー総理んでぃいしや いっぺーやなむんなとん。
    うりがるいくさ はじみゆんでぃ 思とうん。

    あべーならんさ あべーならんさ あべーならんさ しぐやみれ
    んでぃ毎日思ゆん。

  • 安慶名副知事3日目。たーがゆくしやが むっとわからん。やしが安慶名福知事ぬ ゆくしいちょうるぐとぅ
    ニュースぬあびゆん。うんぐとぅし ちかりいん。でーじどう。前や郵政局長ぬ 冤罪やたんどう。
    ニュースぬいし まっとうば うきといねえ じゃあふぇーないんどう。むる うたぐてぃ まちうたらんぐとぅ
    さんねー。だまさってぃ あねえあらんたしがんでぃ うむてぃん ちゃあんならんどう。

    あんしが ただ くちききぐぁーし 全国ニュースないしぇー うかさあねらに。
    天下りぬはなしや まあんかいいちゃが。ありがどぅ まぎにゅーすあらに。いっぺーうかさん。

    文科省ぬまぎわっさや けーわしりてぃ 未遂ぬ副知事あんし 全国ニュースなち、いっぺーうかさん。

    辺野古んじ かぬーしんかぬ うみんかいうとぅさったんでぃいせー ちゅくちぐぁーん いらん。
    うりが大ニュースあらに。いなぐんうみんかいなぎたんでぃど。うすまさ はごーりーたーやさ。

  • 今日ん安慶名副知事ぬニュース。天下りやちゃーなとうが。ぬうんねえんしが。いっぺーうかさん。
    うかさんでぃいちから 新報ぬ意見欄ん 二日続きてぃ 副知事やならんでぃいし ぬとうん。
    うかさあねらに。辞任しからー、罪とがねえんなゆん でぃいしが、日本ぬ慣例あらんてぃ。

    ぬうんちあんすかなーぬばすが。裏口入学さる時ん二日しニュースや終わてぃ、天下りん二日し終わたん。
    安慶名福知事びけー3日めどうやー。ぬうがなあいみ。ぬう考えとうが。やなくぅぬはじみるやみ。

    うとぅるさぬ。いくさ世ぬ始まいや くんぐとうる ぐまぐとぅからやるはじ。毎日毎日ちゅうや
    いくさぬはじまいぬひ やがやんちうむてぃ いちちいちゅしや あんしくちさぬ。

  • 今日ん 安慶名副知事ぬ話。文科省やちゃーなたが。まぎさるニュース かくすんでぃやーま ぐまーぐぁー あびちらかちょうる ちむえーやがや。ぬうがな うかさん。
    まぎーやひんがし ぐまーまぎさんどーし ちゅぬ目 あちみとうるぐとぅやあらんがや。

    いくさん くんぐとぅし 始またるぐとぅやん。気ちきらねえならん。なまどぅなまどぅし いくさはじまゆし
    またねーならんりや うみーんさんたん。ちむぐりさぬ。ぬうぬたみに 300万人ぬまーちゃが。

    やまとぅんちゅうや ふりむんるびけーるやる。あんぐとうる いくさちゅくやーあべーんかい 投票すん。
    ふりてぃるうるんりか うまーん。

  • 今日ぬニュースや 安慶名副知事辞職 んでぃいしやん。安慶名福知事やみみそうんり。口ききんりいち うりしようやーんでぃいち ちゅんかい言ち 言らったるちゅや せーやうらんしが やみみそうんり。

    文科省やちゃーやが。見事早稲田大学教授なとん。
    あきさみようんでぃ 思いる。まーぬたーやが。安慶名副知事やみらしわる んでぃ思たせー。

    文科省ぬさる事んかかいねー あいこーぐぁーぬ ぐとぅるあしが うりしかきたるちゅや うりきさくぁったー
    そうんでーやー。ふりむんるやしが。文科省ゆーんちまー。あったーぬさる事とぅ ならびてぃまー。
    あくやまーやが。ゆーわかいさに。ふりむんるやる。

  • めえなちやあらんしが うちなーぐち日記 すがやーんでぃ言ち、なかなか 書ちゆうさん。

    土曜日や 中学校ぬ 同期会やたん。男ぬちゃーや んな うちなーぐちし あびとうたしが

    女ぬうちなーぐちし いれーりからー うどぅるち いやーいなぐぬうちなーぐち あびーみんでぃ

    言いたん。男んちゃーや うちなーぐち 使いる女は おばーびけーんでぃ 思とうるぐとぅやたん。

    どぅぬとじびけーる うちなーぐちやすんでぃる思とうがや。いなぐぬうちなーぐちちかいせえ

    あんしむちかさる。いなぐや 先生たーぬいるくとぅちち、うちなーぐちや ちからんけえんでぃ

    いきがんちゃーぬ 思とうるふうじやたしが、うかさぬ、また なちかさぬならんたん。

    なちかさんでぃいしや わんや いきがぬうやんかい ゆういらったん。

    うっさぐゎ-ん わからん なちかさぬならん でぃいらったん。

    なつかしいやあらんどう。なさけないんでぃる いちょうんどぅ。

    ぬうが いなぐやてぃん うちなーぐちや ちかいるする。いなぐ いきがぬ あみ んでぃ 思たん。

  • あんやたん。2013年ぬ しわーし26日に なかいまんでぃいる 沖縄県知事ぬ あべーんかい うどぅかさってぃ

    埋立承認しいくゎたん。うぬたみし なまちきてぃ あわりそうん。末代までぃ 忘りてぃならん。

  • あきさみよ。ちゅぬ めんそーちょん。にへーでーびる。ぬうやてぃん 慣りるやいびーる。
    しまくとぅば講演会 いっぺーでぃきちょういびたん。ぬうが しまくとぅばしん 講演会ないさ
    んでぃ思たるくとぅぬ まぎさたいびいん。講演会なてぃから 日記んないるはじ んでぃ思とういびーん。

    しぐ休でぃ ぬうぬ毎日やが んでぃ思やびーしが、ないるうっぴやさんで ちばてぃいちゅるちむえー
    やいびーん。ゆたしく うにげーさびら。

  • あぎじゃびよ、ゆみかしまさぬ。
    ひらがな、びけーえとぅがやー。
    ちゅぶるやみー、さびっさー
    楽しいけど、、、

  • <<
  • 52 33
  • >>
並べ替え:
古い順
新しい順
アプリでサクサク「掲示板」を見る Yahoo!ファイナンス公式アプリ
ファイナンスストア